ផ្នែកទំនាក់ទំនងអន្តរជាតិ សាកលវិទ្យាល័យមហាសារខាម បានរៀបចំកម្មវិធី "MSU stdents preparation for ASEAN" កាលពីថ្ងៃទី 22-26 មេសា 2013 នៅអគារស្រមោលសរបុគ្គលិក សាកលវិទ្យាល័យមហាសារខាម ដោយមានសាស្រ្តាចារ្យ បណ្ឌិតអ៊ិនធិសាន ឆៃយសុខ ជំនួយការសាកលវិទ្យាធិការផ្នែកអភិវឌ្ឍសា្ថប័នឆ្ពោះទៅកាន់ថ្នាក់អន្តរជាតិ ជាប្រធានថ្លែង សន្ទរកថាបើកកម្មវិធី។
កម្មវិធីនេះរៀបចំឡើងដើម្បីឱ្យនិស្សិតបានសិក្សាស្វែងយល់ទាក់ទងនឹងប្រទេសដែលជាសមាជិកអាស៊ាន ព្រមទាំងហ្វឹកហាត់ ជំនាញផ្សេងៗ មិនថាភាសា ការគិត ការសម្របខ្លួន ការផ្លាស់ប្តូរបទពិសោធន៍ ព្រមទាំងការសិក្សាស្វែងយល់លក្ខណៈជាថ្នាក់ ដឹកនាំ ដើម្បីត្រៀមខ្លួនចូលជាសហគមន៍អាស៊ានក្នុងឆ្នាំ 2015។
ផ្នែកទំនាក់ទំនងបរទេស សាកលវិទ្យាល័យមហាសារខាម បាននាំនិស្សិតកម្ពុជាអាហារូបករណ៍ព្រះរាជទាន វិស័យអប់រំ របស់ព្រះអង្គម្ចាស់ក្សត្រី មហាចក្រីសិរិនថន ឆ្នាំសិក្សា 2013 ទៅធ្វើបុណ្យដាក់បាត និងទស្សនកិច្ចសិក្សា កាលពីថ្ងៃទី 17 ខែមេសា ឆ្នាំ 2013 នៅវត្តប៉ាវ៉ាំងឡឺង ខេត្តមហាសារខាម និងសារមន្ទីរដាយណូស័រ ខេត្តកាឡៈស៊ិន ដោយមាននិស្សិតកម្ពុជា ចូលរួមទាំងអស់ចំនួន 161 នាក់។
គោលបំណងនៃការរៀបចំកម្មវិធីទស្សនកិច្ចសិក្សា និងធ្វើបុណ្យដាក់បាតគឺ ដើម្បីឱ្យនិស្សិតបានសិក្សាស្វែងយល់ចំណុច សង្គមខាងក្រៅ ការតាំងសម្មាធិ ធ្វើចិត្តឱ្យស្ងប់ ចំណុចគួរប្រតិបត្តិមូលដ្ឋានគ្រឹះក្នុងការប្រើប្រាស់ជីវិត ហើយសិក្សាស្វែងយល់ ពីទីកន្លែងផ្សេងៗ ក្នុងខេត្តមហាសារខាម និងខេត្តកាឡៈស៊ិន ដើម្បីទម្លាប់ខ្លួន និងត្រៀមខ្លួនក្នុងការប្រើប្រាស់ជីវិតក្នុងប្រទេស ថៃ ហើយធ្វើខ្លួនជានិស្សិតគំរូនៅពេលដែលទៅសិក្សាតាមគ្រឹះស្ថានសិក្សារៀងៗ ខ្លួន។
កាលពីថ្ងៃទី 13 ខែមេសា ឆ្នាំ 2013 និស្សិតកម្ពុជាដែលកំពុងសិក្សានៅសាកលវិទ្យាល័យមហាសារខាម និងនិស្សិតអាហា រូបករណ៍ព្រះរាជទាន លើវិស័យអប់រំដល់ព្រះរាជាណាចក្រកម្ពុជា ឆ្នាំសិក្សា 2013 របស់ព្រះអង្គម្ចាស់ក្សត្រីមហាចក្រីសិរិនថន បានរៀបចំកម្មវិធីជប់លៀងទទួលទេវតាឆ្នាំថ្មីក្នុងថ្ងៃបុណ្យចូលឆ្នាំខ្មែរ។
កម្មវិធីជប់លៀងមាននិស្សិតចូលរួមប្រមាណ 170 នាក់ និងបានអញ្ជើញលោកគ្រូ អ្នកគ្រូដែលបង្រៀនភាសាថៃមូលដ្ឋានគ្រឹះ រយៈពេល 3 ខែ ដល់និស្សិតកម្ពុជាអាហារូបករណ៍ព្រះរាជទានឱ្យចូលរួមទទួលទានអាហាររួមគ្នា ទស្សនាការប្រឡងចម្រៀង របស់និស្សិតកម្ពុជា ការលេងល្បែងប្រជាប្រិយ និងការរាំលេងកម្សាន្តជាដើម។
ទោះបីជាកំពុងជាប់រវល់សិក្សានៅបរទេសដោយមិនបានទៅលេងស្រុកកំណើត ក៏ពួកយើងបានរៀបចំកម្មវិធីនៅទីនេះដែរ ដើម្បីរក្សាប្រពៃណី ទំនៀមទំលាប់ខ្មែរ បង្កភាពសប្បាយរីករាយ បង្កើនចំណងមិត្តភាព និងកាត់បន្ថយការនឹកស្រុកកំណើត។
ក្នុងឱកាសបុណ្យចូលឆ្នាំថ្មីប្រពៃណីខ្មែរនេះ សូមជូនពរឱ្យនិស្សិតទាំងអស់មានសំណាងល្អ សុខភាពល្អ និងខិតខំសិក្សារៀន សូត្រដើម្បីសម្រេចគោលបំណងរបស់ខ្លួន ហើយយកចំណេះដឹងទាំងនេះទៅប្រើប្រាស់ក្នុងការលើកកម្ពស់ជីវភាពគ្រួសារ និង អភិឌ្ឍប្រទេសជាតិឱ្យមានការរីកចម្រើន។
កាលពីថ្ងៃទី ៥ ខែ មេសា ឆ្នាំ ២០១៣ សាកលវិទ្យាល័យមហាសារខាម ប្រទេសថៃបានរៀបចំកម្មវិធីទទួលសញ្ញាបត្រ
សម្រាប់និស្សិតដែលបានបញ្ចប់ការសិក្សា។ ក្នុងឆ្នាំនេះដែរ និស្សិតកម្ពុជាអាហារូបករណ៍ព្រះរាជទាន វិស័យអប់រំដល់ ព្រះរាជាណា ចក្រកម្ពុជា របស់ព្រះអង្គម្ចាស់ក្សត្រីមហាចក្រីសិរិនថន ដែលរៀននៅសាកលវិទ្យាល័យមហាសារខាម បានបញ្ចប់ការសិក្សា ថ្នាក់បរិញ្ញាបត្រចំនួន ៨ នាក់មានដូចជាៈ ១. លោក អ៊ិម តុល ២. លោក សុឆាត ង៉ៅ ៣. កញ្ញា
វៀង ស៊ីឡុង ៤. លោក អេង តុលា ៥. លោក ហេង សុខា (រៀនផ្នែកទេសចរណ៍ និងសណ្ឋាគារ) ៦. លោក ដួង ច័ន្ទតារា ផ្នែកទំនាក់ទំនងអន្តរជាតិ ៧. កញ្ញា សុខ ចាន់ធូ ផ្នែកបរិស្ថាន ៨. អ្នកនាង សែ ហុកសេង ផ្នែកសុខភាពសាធារណៈ។
ក្នុងឱកាសនេះដែរ និស្សិតកម្ពុជាអាហារូបករណ៍ព្រះរាជទានគ្រប់ជំនាន់ដែលរៀននៅសាកលវិទ្យាល័យមហាសារខាម
ផ្ទាល់ និងនិស្សិតអាហារូបករណ៍ព្រះរាជទាន ឆ្នាំសិក្សា ២០១៣ ដែលកំពុងរៀនភាសាថៃមូលដ្ឋានគ្រឹះនៅសាកលវិទ្យា មហាសារខាមរយៈពេល ៣ ខែ ក៏បានចូលរួមអបអរសាទរយ៉ាងច្រើនកុះករ។
ចុងបញ្ចប់សមាគមនិស្សិតកម្ពុជាអាហារូបករណ៍ម្ចាស់ក្សត្រី មហាចក្រីសិរិនថន សូមចូលរូមអបអរសាទរនិស្សិតកម្ពុជា
ដែលបានទទួលជោគជ័យក្នុងការសិក្សា សូមឱ្យអ្នកទាំងអស់គ្នាសំណាងល្អ សុខភាពល្អ និងទទួលបានការងារល្អៗ ហើយនាំយកចំណេះដឹងអស់ទៅប្រើប្រាស់ក្នុងការជួយខ្លួនឯង និងអភិវឌ្ឍប្រទេសជាតិឱ្យកាន់តែមានការរីកចម្រើន។
